aralin 1 - mitolohiya

Interaktibong Aralin sa Filipino 10

Pagsusuri ng Mitolohiya (Persia)

Unang Araw: Panitikan (Mitolohiya)

A. Panimulang Gawain

Magandang umaga! Bago tayo magsimula, alalahanin natin ang nakaraang aralin.

Ano nga muli ang natatandaan ninyo sa ating nakaraang aralin?

B. Panimula (Video-Puna)

May ipapanood akong isang maikling animated film. Ito ay pinamagatang 'El Puente' o 'The Bridge'.

Habang nanonood, suriin ninyo: Ano ang suliranin ng mga tauhan sa tulay? Ano ang naging desisyon nila sa simula? Ano ang naging bunga nito? Pagkatapos, ibigay ang inyong puna. Tama ba ang una nilang naging desisyon na magmatigas?

Sagot:

"Ang suliranin po ay hindi sila makadaan sa tulay dahil ayaw magbigayan."
"Nagmatigas po sila sa simula."
"Ang bunga po ay nahulog silang lahat."
"Mali po ang desisyon nilang magmatigas. Kung nagbigayan sila, lahat sana sila ay nakatawid nang maayos."

Eksakto! Ang ating tatalakayin ngayon ay isang akda kung saan ang mga desisyon at kilos ng mga tauhan, dahil sa pagmamatigas o pagmamalaki, ay nagdulot ng isang malaking trahedya.

C. Pagtalakay (Input)

Ang ating aralin ay tungkol sa Mitolohiya. Ito ay mga salaysay mula sa sinaunang panahon na nagtatampok ng mga diyos, diyosa, at mga bayani na may di-pangkaraniwang kapangyarihan. Ang mitolohiya ay kadalasang nagpapaliwanag ng pinagmulan ng mundo o ng mga aral sa buhay. Ang babasahin natin ay mula sa Persia (Iran ngayon).

D. Pagbasa sa Akda

Basahin natin nang may pang-unawa ang buod ng 'Rostam at Sohrab', isang epikong mitolohiya mula sa Persia.

Buod ng "Rostam at Sohrab"

Si Rostam, ang pinakadakilang bayani ng Persia, ay nagkaanak kay Prinsesa Tahmina na pinangalanang Sohrab. Iniwan ni Rostam si Tahmina bago pa man isilang ang bata, ngunit nag-iwan siya ng isang hiyas (onyx) na ipapasuot kay Sohrab upang makilala niya ito balang araw. Lumaki si Sohrab na isang malakas na mandirigma, ngunit itinago ni Tahmina ang tunay na pagkatao ng kanyang ama. Sa paghahangad ni Sohrab na makilala ang ama, sumapi siya sa hukbo ng kaaway ng Persia, sa pag-aakalang mapipilitan si Rostam na lumantad. Nagharap ang dalawang hukbo. Hinamon ni Sohrab ang pinakamalakas na bayani ng Persia sa isang tunggalian. Si Rostam, na nagpanggap upang hindi makilala, ang tumanggap sa hamon. Naglaban sila nang matindi. Sa kanilang paglalaban, muntik nang matalo si Rostam, ngunit ginamitan niya ito ng pandaraya (sinabing may batas sa Persia na hindi pwedeng pumatay sa unang pagbagsak). Sa muling pagtutunggali, sinaksak ni Rostam ang batang mandirigma. Habang naghihingalo, sinabi ni Sohrab na ipaghihiganti siya ng kanyang ama, si Rostam. Gulat na gulat, tinanong ni Rostam ang pagkakakilanlan ng ina ni Sohrab. Doon niya nakita ang hiyas na ibigay niya kay Tahmina, na suot-suot ni Sohrab sa braso. Nalaman ni Rostam na ang napatay niya ay ang sarili niyang anak. Huli na ang lahat para sa pagsisisi.

E. Gabay na Tanong (Pagsusuri)

Batay sa binasang buod:

1. (Literal) Sino ang dalawang mandirigma na nagtunggali?

Sagot: Si Rostam at ang kanyang anak na si Sohrab.

2. (Literal) Ano ang bagay na nagsilbing palatandaan sana ng pagkakakilanlan ni Sohrab?

Sagot: Ang hiyas (onyx) na bigay ni Rostam kay Tahmina.

3. (Inferensyal) Bakit kaya itinago ni Rostam ang kanyang pagkatao nang lumaban siya kay Sohrab?

Sagot: Marahil ay dahil sa pagmamalaki, ayaw niyang makilala na siya ang dakilang bayani, o baka ayaw niyang madungisan ang kanyang pangalan kung matalo.

4. (Inferensyal) Anong kilos o desisyon ni Sohrab ang nagtulak sa kanya patungo sa trahedya?

Sagot: Ang kanyang desisyon na sumapi sa kaaway na hukbo at ang kanyang pagiging agresibo sa paghamon.

5. (Kritikal) Kung ikaw si Tahmina (ang ina), gagawin mo rin bang itago ang katotohanan sa iyong anak para protektahan siya? Patunayan ang iyong sagot.

Sagot: Hindi po, dahil ang pagtatago ng katotohanan ang lalong nagpahamak sa kanya. Dapat sinabi niya ang totoo para nagkakilala sila ng kanyang ama.

6. (Kultura) Batay sa mga kilos nina Rostam at Sohrab—anong kultura ng Persia ang sa tingin ninyo ay masasalamin dito?

Sagot: "Masasalamin po ang kultura nila na sobrang pinapahalagahan ang karangalan (honor) at ang reputasyon bilang isang mandirigma."

F. Paghahawan ng Balakid

Bigyang-kahulugan ang mga salita:

1. Nagtunggali

Sagot: Naglaban; Nagharap

2. Hiyas

Sagot: Mamahaling bato; Jewel

3. Nagbadya

Sagot: Nagsabi; Nagbabala

4. Pagkakakilanlan

Sagot: Pagkatao; Identity

5. Trahedya

Sagot: Kasawian; Malungkot na pangyayari

G. Pagsasanay (Pangkat at Indibidwal)

Para sa gawaing pangkatan (gawin sa labas ng website na ito):

Pangkat 1 (Visual): Gumawa ng Venn Diagram. Ihambing ang "Rostam at Sohrab" (Persia) sa isang mitolohiya sa Africa (hal. "Osiris").

Pangkat 2 (Analytical): Gumawa ng "Decision Chart". Itala ang 3 desisyon ni Rostam AT 3 desisyon ni Sohrab, at ang naging Bunga.

Pangkat 3 (Dramatic): Ipakita sa isang "Tableau" (Freeze Frame) ang 3 pinakamahalagang eksena.

Pangkat 4 (Argumentative): Maghanda sa Mini-Debate. Tanong: "Sino ang mas dapat sisihin sa trahedya: si Rostam o si Tahmina?"

Para sa indibidwal na gawain, sagutan ito:

Punan ang 'Character Profile' na ito para kay Sohrab: 1. Ang kanyang Mithiin: 2. Ang kanyang Desisyon: 3. Ang naging Kilos: 4. Ang Naging Bunga:

Sagot:
1. Mithiin: Makilala ang ama.
2. Desisyon: Sumali sa kaaway na hukbo.
3. Kilos: Hinamon ang bayani ng Persia.
4. Bunga: Napatay ng sariling ama.

H. Paglalahat

Bilang paglalahat, ano ang ipinapakita ng mitolohiyang ito tungkol sa mga kilos at desisyon ng tao?

Sagot:

"Na ang pagiging padalos-dalos sa desisyon ay nagdudulot ng kapahamakan."
"Na mahalaga ang katapatan at pag-uusap para maiwasan ang trahedya."

Pagpapahalaga: "Ang bawat desisyon, lalo na ang bunsod ng pagmamalaki o paglilihim, ay may katumbas na bunga na maaaring pagsisihan sa huli."

I. Maikling Pagsusulit 1A

Maikling Pagsusulit 1A (10 puntos)

Panuto: Basahin ang bawat aytem at piliin ang titik ng tamang sagot.

Buong Pangalan:

Resulta: Maikling Pagsusulit 1A

Pangalan:

Iskor:

Bilang ng Pagsusubok: