MASUSING BANGHAY ARALIN SA EDUKASYON SA PAGPAPAKATAO 10

Paglago ng Pagmamahal sa Diyos

MGA PINAKAMAHALAGANG KASANAYANG PAMPAGKATUTO (MELCs):

Nakapagpapaliwanag ng kahalagahan ng pagmamahal ng Diyos. (EsP10PB-IIIa-9.1)
Natutukoy ang mga pagkakataong nakatulong ang pagmamahal sa Diyos sa kongretong pangyayari sa buhay. (EsP10PB-IIIa-9.2)
Napangangatwiranan na: Ang pagmamahal sa Diyos ay pagmamahal sa kapwa. (EsP10PB-IIIb-9.3)
Nakagagawa ng angkop na kilos upang mapaunlad ang pagmamahal sa Diyos. (EsP10PB-IIIb-9.4)

A. INTRODUKSIYON (Pagganyak)

Gawain: "SURI-LARAWAN: Sino ang Mahal Mo?"

Magpapakita ang guro ng apat na larawan:

Larawan A: Isang taong taimtim na nagdarasal sa loob ng simbahan.
Larawan B: Isang volunteer na nag-aalaga sa isang matandang maysakit.
Larawan C: Mga miyembro ng isang organization na nagpapakain sa mga batang lansangan.
Larawan D: Isang estudyanteng tapat na nagsasauli ng napulot na pitaka.

Pagproseso ng mga Larawan

Tanong 1: Ano ang ipinapakita sa bawat larawan?

Larawan A (Pagdarasal/Pananampalataya)
Larawan B (Pag-aalaga/Pagmamalasakit)
Larawan C (Pagtulong/Pagkakawanggawa)
Larawan D (Katapatan)

Tanong 2: Alin sa mga larawan ang nagpapakita ng pagmamahal sa Diyos? Alin ang nagpapakita ng pagmamahal sa kapwa?

Ang Larawan A ay direktang pagmamahal sa Diyos. Ang B, C, at D ay pagmamahal sa kapwa. (Maaaring sabihin ng iba na lahat sila ay pagmamahal sa Diyos.)

Tanong 3: Sa iyong palagay, posible bang sabihin na "Mahal ko ang Diyos" ngunit hindi mo mahal ang iyong kapwa? Bakit o bakit hindi?

Hindi po, dahil ang tunay na pagmamahal sa Diyos ay naipapakita sa kung paano natin tratuhin ang ating kapwa.

Transisyon: "Ang mga ipinakitang kilos, sa kapwa man o sa direktang pananalangin, ay may iisang pinatutunguhan..."

B. PAGTALAKAY SA ARALIN

Kahulugan at Kalikasan ng Pagmamahal ng Diyos

Masasabing pagmamahal sa Diyos ang anumang ispiritwal at matalik (intimate) na pakikipag-ugnayan sa kanya (communion with God).

Isa rin itong natatanging karanasan mula sa inspirasyon ng Diyos upang mahinuha ang bawat isa ang karunungan at kalooban ng Diyos sa buhay ng tao.

Gayundin naman, itinuturing ang pagmamahal ng Diyos, bilang pangunahing daan upang mapasimulan ng tao ang kailangan niyang gawin upang mapalapit sa Diyos at maisagawa ang Kanyang kalooban.

Sinasalamin ng pagmamahal ng Diyos ang walang hanggang kaliwanagan ukol sa Kanyang kabutihan at aktibong kapangyarihan sa buhay ng tao. Ang pagmamahal ng Diyos ang maituturing na sentro ng pananampalataya ng bawat tao. Mahalaga ang pagtitiwala sa bawat isa sa walang hanggang pagkakandili ng Diyos at kabutihang hatid nito sa ating buhay.

Ilan sa mga Katangian ng Pagmamahal ng Diyos

Ang pagmamahal ng Diyos ay nagbubuklod sa lahat ng tao.
Sa bisa ng pagmamahal ng Diyos, nagkakaroon ang tao ng matibay na sandigan upang pag-isahin ang puso ng bawat isa sa pamamagitan ng pag-ibig. Dahil sa ang Diyos ay pag-ibig, sinuman na nabubuhay sa pagmamahal ay nananahanan din sa pagmamahal ng Diyos.
Ang pagmamahal ng Diyos ay isang biyaya ng espiritu.
Kung naniniwala tayo sa pagmamahal ng Diyos, ito ang magiging batayan at pamantayan ng ating buhay at pagpapasiyang moral.
Ang pagmamahal ng Diyos ay banal at walang hanggan.
Ang pagmamahal ng Diyos ay masasalamin sa kasaysayan ng pagkakalikha at kaligtasan ng tao. Nakaukit sa bawat isa sa atin ang pagmamahal ng Diyos mula sa ating pagsilang hanggang kamatayan.
Ang pagmamahal ng Diyos ay nakapagbibigay ng lunas o kagalingan at pagbabago sa buhay ng tao.
Ang pagmamahal ng Diyos ay isang espirituwal na enerhiya na nagbibigay-daan tungo sa pagbabago at pagbabalik-loob.

Kahalagahan Ng Pagmamahal Ng Diyos

Nababago nito ang kamalayan ng tao.
Dahil sa pagmamahal ng Diyos, nahihikayat ang bawat isa tungo sa makatotohanan at walang takot na pagsusuri ng sariling buhay.
Pinadadalisay ang puso ng bawat tao upang magmahal ng tunay sa kapwa.
Mula sa karunungan ng kaisipan, pinatitingkad ng pag-ibig na nanggagaling sa puso ang ugnayan ng tao sa Diyos at kapuwa. Dahil dito, ang pagmamahal sa kapuwa ay isang marapat na pagtugon sa biyaya ng pagmamahal ng Diyos na ibinigay sa atin. Ang anumang gawin natin sa ating kapuwa ay parang ginawa na rin natin sa Diyos.
Nagagabayang magpasiya at kumilos ang tao.
Ito ay batay sa pagpapahalagang moral at pagsasabuhay ng mga birtud.
Nakakaranas ang tao ng pagbabalik-loob.
Binabago ng pagmamahal sa Diyos ang mga maling gawi at kilos ng tao. Nagsisilbi itong liwanag upang maituwid ang landas ng tao at mapagtanto ang mga bagay na mahalaga at makatwiran sa buhay.

Mga Hakbangin Upang Mapaunlad ang Pagmamahal sa Diyos

Ang pagmamahal sa Diyos ay maituturing na pinakamahalagang batayan upang maisabuhay ng tao ang kanyang kaganapan at tumugon sa kalooban ng Diyos.

Buksan ang kaisipan at pukawin ang kamalayan upang suriin ang bawat karanasan at sitwasyon sa buhay.
Suriin ang mga potensiyal na karanasan at kaalaman na maaaring magbunga ng pagmamahal sa Diyos.
Isaalang-alang ang lahat ng kaalaman at pagmamahal sa anumang hakbangin tungo sa pagpapaunlad ng pagmamahal sa Diyos.
Maglaan ng regular na panahon upang paunlarin ang pagmamahal sa Diyos.
Makilahok sa mga pangkatang Gawain ng iyong simbahan.

C. PAGSASANAY (Aplikasyon)

Gawain: "ANG AKING HAKBANG TUNGO SA KANYA"

Panuto: Hahatiin ng mga mag-aaral ang isang buong papel sa dalawang bahagi.

Bahagi 1: Pagbabalik-tanaw (MELC 9.2)
Sumulat ng isang kongkretong pangyayari sa iyong buhay kung saan malinaw mong naramdaman o natukoy ang tulong at pagmamahal ng Diyos.

Halimbawa: "Nang magkaroon ng malubhang sakit ang aking ina..."

Bahagi 2: Plano ng Paglago (MELC 9.4)
Pumili ng dalawang (2) hakbang na nais mong isagawa. Sa tapat nito, isulat ang angkop at tiyak na kilos.

Halimbawa:
Hakbang: Maglaan ng regular na panahon...
Kilos: Maglalaan ako ng 10 minuto bago matulog...

D. PAGPAPAHALAGA (Sintesis)

Paglalahat at Repleksyon

Buod: Natutunan natin ngayon na ang pagmamahal sa Diyos ay isang personal na ugnayan na may kakayahang magbago, magpagaling, at magbigay-gabay sa ating buhay.

Tanong: Sapat na bang sabihing 'Mahal ko ang Diyos' habang nakaupo lamang sa loob ng simbahan?

Hindi po. Kailangan itong makita sa gawa.

Realisasyon: "Ang pagmamahal sa Diyos ay pagmamahal sa kapwa." Hindi maaaring ihiwalay ang dalawa.

Pangwakas na Tanong: Paano mo maipapakita ang iyong pagmamahal sa Diyos sa isang taong kasama mo sa bahay o sa kaklase mong nakasamaan mo ng loob pag-uwi mo ngayong araw?

Sa pamamagitan po ng pagiging masunurin sa aking magulang pag-uwi, pagtulong sa gawaing bahay nang hindi inuutusan, o sa pamamagitan ng pakikipagbati sa kaklase ko.

E. EBALWASYON (1-3)

1. Ang tao ay biniyayaan ng talino at kalayaan. Likas sa kanya ang _________. a. kabutihan | b. kagandahan | c. kasipagan | d. katalinuhan

TAMANG SAGOT: a. kabutihan

2. Mapalad ang tao dahil bukod sa binigyan siya ng buhay ay ginawa siyang _________. a. kawangis ng Diyos | b. katuwang ng Diyos | c. kamukha ng Diyos | d. kamanlilikha ng Diyos

TAMANG SAGOT: a. kawangis ng Diyos

3. Huwag mo nang hangaring tumulad pa sa iba o hangaring mapasa iyo ang katangian na nasa ibang tao. Ang ibig sabihin ay _________. a. ang bawat tao ay mayroong mga katangiang natatangi lamang para sa kanya
b. ang tao ay magiging maligaya kung susundin niya ang kanyang gusto
c. marami ang katangian ng tao kaya huwag kang mainggit sa iba
d. higit na mabuti ang magpakatotoo ka

TAMANG SAGOT: a. ang bawat tao ay mayroong mga katangiang natatangi lamang para sa kanya

E. EBALWASYON (4-6)

4. Ang mga biyayang bigay ng Diyos ay isang paraan ng pasasalamat sa Kanya. Ano ang kahulugan ng pahayag? a. Kailangang paunlarin natin ang ating sarili habang buhay.
b. Kailangang mag-aral tayo habang buhay para ialay sa Diyos.
c. Ialay ang mga biyayang mula sa Diyos sa tuwing nagsisimba.
d. Mahalagang gamitin natin ang mga biyayang kaloob ng Diyos sa pag-unlad ng sarili at pagtulong sa kapwa.

TAMANG SAGOT: d. Mahalagang gamitin natin ang mga biyayang kaloob ng Diyos...

5. Ano ang diwa nag pahayag na ito? “Ang iyong buhay ay biyayang galing sa Diyos. Kung paano mo isasabuhay ang biyayang iyan ay iyong ihahandog sa Kanya.” a. Higit na matutuwa ang nagbigay ng buhay kung magpapasalamat tayo sa kanya.
b. Ang paraan ng pagsasabuhay ng tao ang ibabalik sa lumikha ng buhay.
c. Mabuti lamang ang buhay na ihahandog natin sa Diyos.
d. Kailangang ibalik natin ang buhay sa lumikha nito

TAMANG SAGOT: b. Ang paraan ng pagsasabuhay ng tao ang ibabalik sa lumikha ng buhay.

6. Ano ang kahulugan ng pahayag na “patay ang pananampalatayang walang kalakip na gawa”? a. Mahirap maligtas ang iyong kaluluwa kung magdarasal ka lamang.
b. Nasa pagtulong sa kapwa ang pagsasabuhay ng pananampalataya.
c. Ipagdasal nating ang mga taong nagugutom.
d. Nalalapit sa Diyos ang taong kumikilos.

TAMANG SAGOT: b. Nasa pagtulong sa kapwa ang pagsasabuhay ng pananampalataya.

E. EBALWASYON (7-8)

7. “Nag-iiwan tayo ng marka sa bawat kabutihang ating ginagawa.” Ano ang pinakaangkop na kahulugan ng pahayag? a. Naaalala at nagiging inspirasyon sa iba ang ating mga mabuting gawa.
b. Iginuguhit sa palad ng tao ang kanyang mga ginagawa.
c. Tumatatak sa ating pagkatao ang pagiging mabuti.
d. Pansamantalang nararamdaman ng tao ang iyong kabutihan.

TAMANG SAGOT: a. Naaalala at nagiging inspirasyon sa iba ang ating mga mabuting gawa.

8. Likas sa tao ang pagiging maka-Diyos at ang patunay nito ay__________. a. ang pagdududa ng tao sa kapangyarihan ng Diyos.
b. ang pagtanggap niya sa kanyang mga lakas at kahinaan.
c. ang pagtatanong ng tao ukol sa kapangyarihan ng Diyos.
d. ang patuloy niyang pag-aaral at pananaliksik sa katotohanan

TAMANG SAGOT: b. ang pagtanggap niya sa kanyang mga lakas at kahinaan.

E. EBALWASYON (9-10)

9. Isinilang ang tao na hindi perpekto katulad ng Diyos subalit maaari siyang: a. tumulad sa kabutihan ng Diyos.
b. sumunod sa kapangyarihan ng Diyos.
c. manalangin upang maging perpekto tulad ng Diyos.
d. magsaliksik upang maging perpekto tulad ng Diyos.

TAMANG SAGOT: a. tumulad sa kabutihan ng Diyos.

10. Hindi maaaring sabihin sa isang taong nagugutom na ipagdasal niya ang kanyang pagdurusa. Kailangan ay____________. a. makiramay ka sa kanyang gutom na nadarama.
b. may gawin ka upang maibsan ang kanyang gutom.
c. manalangin ka rin upang maibsan ang kanyang gutom.
d. tumawag ng ibang taong maaaring tumulong sa kanyang pagdurusa.

TAMANG SAGOT: b. may gawin ka upang maibsan ang kanyang gutom.

Slide 1 / 13

ESP 10 - Kwarter 3 - Aralin 1 (Gamit ng Guro)